අලෙවිකරණ ක්ෂේත්‍රයේ අනාගත නායකයින් සංවර්ධනය කිරීම සඳහා සිය කැපවීම පෙන්නුම් කරමින් හැටන් නැෂනල් බැංකුව, ශ්‍රී ලංකා අලෙවිකරණ ආයතනය (SLIM) සමඟින් එක්ව විශේෂ පුහුණු වැඩසටහනක් පසුගියදා හඳුන්වා දුන්නේය. මෙම විශේෂ වැඩසටහන මඟින් සිසු දරුදැරියන්ට විකුණුම් සහ ව්‍යාපාර සංවර්ධනය පිළිබඳ ජීවිතයේ සැබෑ අත්දැකීම් ලබා දෙනු ඇත.
මෙම වැඩසටහන හරහා SLIM හි අලෙවිකරණය පිළිබඳ වෘත්තීය සහතික පත්‍ර පාඨමාලාව (Professional Certificate in Marketing-PCM) සහ ඩිජිටල් අලෙවිකරණය පිළිබඳ සහතික පත්‍ර පාඨමාලාව (CDM) හදාරන සිසු දරුදැරියන්ට ශ්‍රී ලංකාවේ ඉහළම පෞද්ගලික බැංකුවක් වන HNB සමඟ වැඩ කිරීමට විශේෂ අවස්ථාවක් හිමි වේ. එය ඔවුන්ට සැබෑ ව්‍යාපාරික පරිසරයක දේවල් ක්‍රියාත්මක වන ආකාරය අත්විඳීමට උපකාරී වනු ඇත.
මෙම හවුල්කාරීත්වයට අදාල නිල අවබෝධතා ගිවිසුමට අත්සන් තැබීම පසුගියදා HNB Towers හිදී සිදු වූ අතර මෙය ආයතන සහ අධ්‍යාපන ආයතන අතර සම්බන්ධතාවය ශක්තිමත් කිරීමේ වැදගත් පියවරකි. මෙම වැඩසටහන හරහා HNB එහි විකුණුම් කටයුතු හසුරුවන ආකාරය, ගනුදෙනුකරුවන් සමඟ සබඳතා ගොඩනඟා ගන්නා ආකාරය සිසු දරුදැරියන්ට දැක ගැනීමට හා ඉගෙන ගැනීමට හැකි වනු ඇත. තවද මෙය ඔවුන්ගේ ප්‍රායෝගික දැනුම වැඩිදියුණු කිරීමට සහ රැකියාවක් ලබා ගැනීමේ අවස්ථා වැඩි කිරීමට උපකාරී වේ. මෙමගින් ඔවුන් කොතරම් හොඳින් ක්‍රියා කරනවාද යන්න මත පදනම්ව ඔවුන්ට ස්ථාවර මාසික ගෙවීමක් සහ දීමනාවලට අමතරව ඔවුන් ඉගෙන ගන්නා අතරතුර ඔවුන්ට මූල්‍යමය සහාය ද ලබා දෙයි.
මේ පිළිබඳව අදහස් දක්වමින් HNB හි ජ්‍යෙෂ්ඨ විධායක උප සභාපති/ප්‍රධාන මෙහෙයුම් නිලධාරී සන්ජේ විජේමාන්න මහතා පැවසුවේ “HNB හි අපි සැමවිටම තරුණ තරුණියන්ට සාර්ථක වෘත්තීන් සඳහා අවශ්‍ය සැබෑ කුසලතා ලබා දීමෙන් ඔවුන්ට සහාය වීමට කැමතියි. SLIM සමඟ අපගේ හවුල්කාරිත්වය තුළින් සිසුන්ට ඔවුන්ගේ අලෙවිකරණය පිළිබඳ දැනුම සැබෑ විකුණුම් අවස්ථාවලදී භාවිත කිරීමට හොඳ අවස්ථාවක් ලබා දෙනවා. එය පාරිභෝගික සබඳතා සහ ව්‍යාපාර වර්ධනයේ වැදගත් කුසලතා ඉගෙන ගැනීමට ඔවුන්ට උපකාරී වේවි.” යනුවෙනි.
“මෙම හවුල්කාරිත්වය හරහා සිසු දරුදැරියන්ට රැකියා පිළිබඳ සැබෑ පළපුරුද්දක් ලබා දීමෙන් අලෙවිකරණය පිළිබඳ අධ්‍යාපනය වැඩිදියුණු කිරීමට අපගේ කැපවීම පෙන්නුම් කරනවා. HNB සමඟ එක්ව වැඩ කිරීමෙන් අපගේ සිසු දරුදැරියන්ට පන්තියේදී ඉගෙන ගත් දේ සැබෑ රැකියා අවස්ථාවලදී භාවිත කිරීමට අවස්ථාවක් ලබා දෙනවා. ඒවගේම මෙවැනි ප්‍රායෝගික අත්දැකීම් ඔවුන්ට රැකියා සඳහා වඩාත් සූදානම් වීමට සහ බඳවා ගැනීමේ අවස්ථා වැඩිදියුණු කරන අතර අලෙවිකරණ ක්ෂේත්‍රයේදී සේවකයින්ගෙන් සමාගම් අපේක්ෂා කරන කුසලතා, දැනුම සහ වගකීම් හැසිරවීමට සිසු දරුදැරියන්ට හොඳින් සූදානම් වීමටත් හැකියි.” යනුවෙන් SLIM සභාපති ගයාන් පෙරේරා මහතා පැවසීය.
මෙම හවුල්කාරිත්වය මගින් රටේ ආර්ථික වර්ධනයට දායක වන අධ්‍යාපනික වැඩසටහන් ප්‍රවර්ධනය කිරීමට HNB හි අඛණ්ඩ කැපවීම මැනවින් පෙන්නුම් කරයි.
