கொழும்பு துறைமுகத்தின் தற்போதைய கட்டண முறை காரணமாக இலங்கைக்கு ஆண்டுக்கு அமெரிக்க டொலர் 50 மில்லியனுக்கும் அதிகமான வெளிநாட்டு நாணயம் இழக்கப்படக்கூடும் எனும் கூற்றை அதிகாரிகள் முதலில் ஆராய்ந்து பார்க்க வேண்டும் என்று ஒன்றிணைந்த ஆடைச் சங்கங்களின் மன்றம் (JAAF) கோரிக்கை விடுத்துள்ளது. ஏற்றுமதியாளர்கள் தற்போது நம்பி செயல்படும் விதிமுறைகளில் மாற்றம் செய்வதற்கு முன் இந்த ஆய்வு மேற்கொள்ளப்பட வேண்டும் என்று அச்சங்கம் கூறுகிறது.
இலங்கை சரக்கு போக்குவரத்து மற்றும் மேம்பாட்டு சங்கம் (CEYFFA) சார்பாக அதன் தலைமைச் செயலாளர் இனாம் கஃபூர் அவர்கள், கொழும்பு துறைமுகத்தில் நிகழும் சட்டப்பூர்வ மாற்றங்கள் குறித்து கடந்த அக்டோபர் 31 ஆம் திகதி ஆங்கில செய்தித் தாள் ஒன்றுக்கு கருத்து தெரிவிக்கையில், வெளிநாட்டு நாணயம் இழக்கப்படக்கூடும் என்று குறிப்பிட்டுள்ளார். அந்தக் கூற்றுக்காக எந்தவொரு குறிப்பிட்ட புள்ளிவிவரமோ, கணக்கீடோ அல்லது சான்றோ அறிக்கையில் சமர்ப்பிக்கப்படவில்லை.
இது குறித்து கருத்து தெரிவித்த JAAF-இன் பிரதம செயலாளர் யோஹான் லோரன்ஸ் அவர்கள், “ஆடை ஏற்றுமதியாளர்கள் ஒவ்வொரு நாளும் பொருட்களை அனுப்புகிறார்கள், மேலும் அவர்கள் தங்களுக்குக் கிடைக்கும் போக்குவரத்துக் கட்டணங்களை அடிப்படையாகக் கொண்டு தங்கள் செலவுகளைத் திட்டமிடுகிறார்கள். இவ்வளவு பெரிய தொகை குறித்த கூற்று நிச்சயமாக ஆராயப்பட வேண்டும். ஆனால் நியாயமான வர்த்தகத்தை உறுதிப்படுத்தும் மற்றும் நியாயமற்ற கட்டண வசூலைத் தடுக்கும் விதிமுறைகள், இதுவரை சான்றுகளால் உறுதிப்படுத்தப்படாத ஒரு கூற்றின் அடிப்படையில் மாற்றப்படக்கூடாது என்பதே எங்கள் கருத்து” என்று குறிப்பிட்டார்.
JAAF உறுப்பினர்களுக்கு இதனால் ஏற்படக்கூடிய தாக்கம் மிகவும் அதிகமாகும். 2023 மார்ச் 31 திகதியிட்ட 2334/26 இலக்க வர்த்தமானி அறிவிப்பின் மூலம் நான்கு கொள்கைகள் விதிக்கப்பட்டுள்ளன. சரக்கு போக்குவரத்துக்கான நிர்ணயிக்கப்பட்ட கட்டணங்களுக்கு கூடுதலாக சேவை வழங்குநர்கள் அதிக கட்டணம் வசூலிப்பதைத் தடுப்பதன் மூலம், இறக்குமதியாளர்கள் மற்றும் ஏற்றுமதியாளர்கள் ஆகிய இரு தரப்பினரையும் இது பாதுகாக்கிறது.
இந்த முறையின் மூலம் சரக்கு போக்குவரத்து செய்பவர்கள் அனைத்து செலவுகளையும் உள்ளடக்கிய ஒற்றை போக்குவரத்துக் கட்டணம் மற்றும் உள்நாட்டில் செலுத்த வேண்டிய ஒற்றைக் கட்டணமான விநியோக உத்தரவுக் கட்டணம் (DO charge) ஆகியவற்றை மட்டும் செலுத்த வாய்ப்பு கிடைக்கிறது. இந்த DO கட்டணம் வணிகக் கப்பல் பணிப்பாளர் நாயகத்திடம் சமர்ப்பிக்கப்பட்டு அவர்களின் இணையதளத்தில் வெளியிடப்பட வேண்டும். சில நிறுவனங்கள் விநியோக உத்தரவு ஒன்றை வெளியிடும் எளிய பணிக்காக ஏற்கனவே 100,000 ரூபாய் வரை அதிகமான தொகையை வசூலிக்கின்றன. 2013 ஆம் ஆண்டுக்கு முன் இறக்குமதியாளர்கள் மற்றும் ஏற்றுமதியாளர்கள் தனித்தனியாக சுமார் 50 கட்டணங்களை எதிர்கொள்ள வேண்டியிருந்தது என்று தேசிய ஏற்றுமதியாளர்கள் வர்த்தக சபை (NCE) சுட்டிக்காட்டுகிறது. இலங்கை சரக்கு போக்குவரத்து மற்றும் மேம்பாட்டு சங்கம் மீண்டும் அதே பழைய முறைக்கே செல்ல கடுமையான முயற்சியில் ஈடுபட்டுள்ளதாகத் தெரிகிறது, மேலும் NCE நிறுவனம் அந்த நிலைக்குத் திரும்புவது குறித்து கடுமையாக எச்சரித்துள்ளது.
வெளிநாட்டு நாணயம் வீணடிக்கப்படுவதாகக் கூறப்படும் கூற்றிலேயே தெளிவான முரண்பாடுகள் உள்ளன என்று NCE சுட்டிக்காட்டுகிறது. துறைமுகக் கட்டணங்கள் ஒரு உத்தியோகப்பூர்வ கட்டணப் பட்டியலின் மூலம் நிர்ணயிக்கப்படுகின்றன, மேலும் 2022 ஜூன் மாதம் முதல் இலங்கை துறைமுக அதிகார சபை கப்பல் நிறுவனங்களிடமிருந்து அந்தக் கட்டணங்களை அமெரிக்க டொலரில் பெற்று வருவதாகத் தெரிவிக்கப்படுகிறது. எனவே இலங்கையின் துறைமுகத்திற்கோ அல்லது ஒரு முனையத்தை இயக்குபவருக்கோ செலுத்தப்படும் பணம் வெளிநாட்டு நாணய வரவாகும், வீணடிப்பு அல்ல. போக்குவரத்துக் கட்டணத்தின் மீதமுள்ள பகுதி கடல் வழியாக சரக்குகளை எடுத்துச் செல்வதற்காக கப்பல் நிறுவனத்திற்கே கிடைக்கிறது.
மேலும், இது ஒவ்வொரு சர்வதேச கப்பல் அனுப்புதலிலும் வெளிநாடுகளில் ஈட்டப்படும் பணமாகும். எனவே ஒரு வெளிநாட்டு போக்குவரத்து நிறுவனத்திற்கு செய்யப்படும் சட்டபூர்வமான கட்டணம், தானாகவே சட்டவிரோதமான பணப் புழக்கமாக நாட்டை விட்டு வெளியேறுவதாகக் கருத முடியாது. அளவு குறித்த எளிய கணக்கீடு ஒன்று, இங்குள்ள விவரங்கள் ஏன் முக்கியம் என்பதைத் தெளிவுபடுத்துகிறது. 2025 ஜனவரி முதல் அக்டோபர் வரையிலான காலப்பகுதியில் கொழும்பு துறைமுகம் மூலம் சுமார் 1.10 மில்லியன் இறக்குமதி மற்றும் ஏற்றுமதி கொள்கலன்கள் (TEUs) கையாளப்பட்டுள்ளன. எனவே, இந்த மொத்த கொள்கலன் அளவின் மீது அமெரிக்க டொலர் 50 மில்லியன் இழப்பு பங்கிடப்பட்டால், அது ஒரு கொள்கலனுக்கு சுமார் 38 முதல் 45 அமொிக்க டொலர்கள் வரையிலான தொகையாக இருக்கும். இந்தக் கணிதப் பகுப்பாய்வு மட்டும் எதையும் நிரூபிக்கவில்லை என்றாலும், நம்பகமான மதிப்பீட்டைச் செய்ய முடிவது உண்மையான பரிவர்த்தனை தரவுகளை அடிப்படையாகக் கொண்டு மட்டுமே என்பதை இது தெளிவுபடுத்துகிறது.
