ජනාධිපති අනුර කුමාර දිසානායක මහතා පසුගියදා චීනයේ සිදුකළ සංචාරයේදී දෙරට අතර පවතින දිගුකාලීන මිත්‍රත්වය සහ රාජ්‍ය තාන්ත්‍රික සබඳතා ශක්තිමත් වූ අතර ආර්ථික සහයෝගීතාවය වර්ධනය කිරීම සඳහා නව අවස්ථාවන් විවර කළේය.
ජනාධිපතිතුමාගේ මෙම සංචාරය අතර සිදු වූ සුවිශේෂී සිදුවීමක් වූයේ නවෝත්පාදනය සහ තිරසාර සංවර්ධනය අවධාරණය කරමින් BYD ඇතුළු ලොව ප්‍රමුඛ පෙළේ සමාගම් සමඟ සාකච්ඡා රැසක් ද සිදු කිරීමයි.
මෙහිදී 2025 පෙබරවාරි 1 වන දින සිට ක්‍රියාත්මක වන පරිදි ශ්‍රී ලංකාවේ වාහන ආනයන සීමා ඉවත් කිරීම ඇතුළුව පරිසර හිතකාමී ප්‍රවාහන විසඳුම් සහ යටිතල පහසුකම් ප්‍රවර්ධනය කිරීම පිළිබඳව වැඩි වශයෙන් සාකච්ඡා කෙරිණි.
වාහන ආනයන සීමා ඉවත් කිරීමෙන් පසු ශ්‍රී ලංකාවට ආනයනය කිරීමට නියමිත නව බලශක්ති වාහන (NEV) නිෂ්පාදකයෙකු ලෙස BYD, රටේ තිරසාර ප්‍රවාහනය ප්‍රවර්ධනය කිරීමේදී ප්‍රධාන කාර්යභාරයක් ඉටු කිරීමට අරමුණු කරයි. ජනාධිපතිතුමාගේ මෙම සංචාරය අතරතුර BYD ඔවුන්ගේ පාරිසරික බලපෑම අවම කරන තාක්ෂණයන් නිර්මාණය කිරීමේදී භාවිත කරනු ලබන සුවිශේෂී දැනුම හා කුසලතාවන් පෙන්නුම් කළ අතර ශ්‍රී ලංකාවේ තිරසාර ආර්ථික ප්‍රගමනයට සහාය වීම සඳහා ඇති කැපවීම ද නැවත අවධාරණය කළේය.
BYD, ශ්‍රී ලංකාවේ ජෝන් කීල්ස් සමූහය සහ CG Corp Global සමාගම අතර සහයෝගීතාවයක් වන John Keells CG Auto යටතේ ක්‍රියාත්මක වේ. හරිතවත් අනාගතයක් සඳහා වන රජයේ දැක්මට අනුකූල වන නව්‍ය, පරිසර හිතකාමී ප්‍රවාහන විසඳුම් ලබා දීමේදී සමාගම ඉදිරියෙන් සිටීමට සමත්ව ඇත.
