විවිධ අභියෝග මධ්‍යයේ බැංකු සේවා අඛණ්ඩව පවත්වා ගෙන යාම සහතික කරමින් හැටන් නැෂනල් බැංකුව එහි ව්‍යාපාර අඛණ්ඩතා කළමනාකරණ පද්ධතිය (Business Continuity Management System) සඳහා ISO 22301 2019 සහතිකය හිමි කරගෙන ඇත. බියුරෝ වෙරිටාස් විසින් සිදු කරන ලද ස්වාධීන විගණනයකින් පසුව මෙම සහතිකය ලබා දෙන ලදී. මෙම විගණනයට සමස්ත බැංකුව පුරා අවදානම් කළමනාකරණය, තොරතුරු තාක්ෂණ පද්ධති මෙන්ම කොළඹ හා දීප ව්‍යාප්ත HNB පාරිභෝගික ඒකක හරහා ගනුදෙනුකරුවන් සෘජුවම භාවිතා කරන හෝ අත්විඳින සේවා ඇතුළත් විය.
මේ සම්බන්ධයෙන් අදහස් දැක්වූ HNB කළමනාකාර අධ්‍යක්ෂ/ප්‍රධාන විධායක නිළධාරී දමිත් පල්ලේවත්ත මහතා පැවසුවේ “ඩිජිටල් බැංකුකරණය වේගයෙන් වර්ධනය වන සහ මෙහෙයුම් අවදානම් නිරන්තරයෙන් වෙනස් වන කාලයක මෙම සහතිකය HNB හි සමස්ත මෙහෙයුම් තුළ ව්‍යාපාර අඛණ්ඩතාව කෙතරම් ශක්තිමත් ලෙස ඒකාබද්ධ කර ඇතිද යන්න වැදගත් පිළිගැනීමක්. මෙය බැංකුව වසර ගණනාවක් පුරා සිදු කර ඇති දිගුකාලීන සැලසුම්කරණය, නිරන්තර පරීක්ෂණ ක්‍රියාවලි සහ විවිධ කණ්ඩායම් අතර සමීප ක්‍රියාකාරීත්වය පිළිබඳ සාක්ෂියක්. ඒ හරහා අත්‍යවශ්‍ය සේවාවන් අඛණ්ඩව ලබා දීමටත්, ප්‍රතිසාධන ක්‍රියාවලිය වේගයෙන් ක්‍රියාත්මක කිරීමටත් හැකිවන අතර අභියෝගාත්මක අවස්ථාවන්හිදී පවා ගනුදෙනුකරුවන්ට ආරක්ෂිත සහ බාධාවකින් තොර බැංකු සේවාවන් විශ්වාසයෙන් ලබා ගත හැකි වනවා.” යනුවෙනි.
තවද මෙම සහතිකය මගින්, සිදුවිය හැකි අවදානම් හඳුනා ගැනීමට, බාධාකාරී සිදුවීම්වලදී ඵලදායී ලෙස ප්‍රතිචාර දැක්වීමට සහ පද්ධති අක්‍රිය වීම්, ස්වාභාවික විපත් හෝ සයිබර් ප්‍රහාර වැනි හදිසි අවස්ථාවලදී තීරණාත්මක බැංකු සේවා අඛණ්ඩව පවත්වාගෙන යාමට HNB සතු හැකියාව අවධාරණය කරයි. එමෙන්ම එය ගනුදෙනුකරුවන්, නියාමකයින් සහ ව්‍යාපාරික හවුල්කරුවන්ගේ ආරක්ෂාව ද සහතික කරයි.
මෙම සහතිකය ලබා ගැනීමේ ක්‍රියාවලිය අවදානම් කළමනාකරණ අංශය යටතේ ක්‍රියාත්මක වන බැංකුවේ ව්‍යාපාර අඛණ්ඩතා කළමනාකරණ කණ්ඩායම විසින් නායකත්වය දුන් මධ්‍යස්ථව කළමනාකරණය කරන ලද සහ මනා ලෙස සම්බන්ධීකරණ කළ ව්‍යාපෘතියක් මගින් ඉදිරියට ගෙන යන ලදී. මේ සඳහා HNB හි සියලුම ව්‍යාපාරික ඒකක සහ ප්‍රධාන කාර්යාල අංශ සක්‍රීයව සහයෝග ලබා දෙමින් සමීපව කටයුතු කළේය. මෙම සාමූහික ක්‍රියාමාර්ගය මඟින් බැංකුවට එහි සමස්ත ක්‍රියාවලීන් හා පද්ධති ගෝලීය පිළිගත් ප්‍රමිතීන්ට අනුකූලව කරගැනීමට හැකි විය. එහි ප්‍රතිඵලයක් ලෙස, බැංකුවේ සියලුම පාරිභෝගික ඒකක හා සේවාවන් හරහා බාධාවන්ට ප්‍රතිචාර දැක්වීමට සහ මෙහෙයුම් අඛණ්ඩව සිදු කරගෙන යාමට බැංකුවට ඇති හැකියාව තවදුරටත් ශක්තිමත් විය.
මෙම විගණනය මඟින් බැංකුවේ අවදානම් තක්සේරු කිරීම්, හදිසි අවස්ථා සඳහා ඇති සූදානම, ව්‍යසනයකින් පසු මෙහෙයුම් යථා තත්ත්වයට පත් කිරීමේ හැකියාව සහ සියලුම වැදගත් මෙහෙයුම් ඒකක හරහා සේවාවන් පවත්වාගෙන යාමට එහි සැලසුම්ගත ප්‍රවේශය සමාලෝචනය කරන ලදී. සවිස්තරාත්මක විශ්ලේෂණයක් සිදු කිරීමෙන් අර්නස්ට් සහ යන්ග් මෙම ක්‍රියාවලියට සහාය වූ අතර එමගින් බැංකුවේ පවතින ව්‍යාපාර අඛණ්ඩතා රාමුව ජාත්‍යන්තර ප්‍රමිතීන් සමඟ ගැලපීමට උපකාරී විය.
