හැටන් නැෂනල් බැංකුව 2025 වසරේ පළමු කාර්තුවේදී අඛණ්ඩ වර්ධන වේගයක් පවත්වා ගනිමින් සමූහයේ බදු පසු ලාභය (PAT) පසුගිය වසරට සාපේක්ෂව 49% ක සහ බැංකුවේ බදු පසු ලාභය 64% ක වර්ධනයක් පෙන්නුම් කර ඇත. ඒ අනුව මෙම කාල පරිච්ඡේදයේදී සමූහයේ සහ බැංකුවේ බදු පසු ලාභය පිළිවෙළින් රු. බිලියන 11.1 ක් සහ රු. බිලියන 10.2 ක් විය.
2024 වසරේ අදාල කාලපරිච්ඡේදයට සාපේක්ෂව පොලී අනුපාත අඩු වුවද, 2025 වසරේ පළමු කාර්තුවේදී බැංකුවේ ශුද්ධ පොලී ආදායම (NII) පසුගිය වසරට සාපේක්ෂව රු. බිලියන 23.7 ක් දක්වා 7.7% කින් වර්ධනය විය. බැංකුවේ ණය පොත පසුගිය වසරට සාපේක්ෂව රු. බිලියන 159 කින් ඉහළ ගියද, පොලී ආදායම පසුගිය වසරට සාපේක්ෂව 14.4% කින් පහත වැටුණි. කෙසේ වෙතත්, CASA (ජංගම සහ ඉතිරුම් ගිණුම්) තැන්පතු ඉහළ යාම හේතුවෙන් බැංකුවේ පොලී වියදම් පසුගිය වසරට සාපේක්ෂව 27.1% කින් පහත වැටුණි. එහි ප්‍රතිඵලයක් ලෙස බැංකුවේ ශුද්ධ පොලී ආදායම (NII) වර්ධනය විය.
මෙම මූල්‍ය කාර්යසාධනය පිළිබඳව අදහස් දක්වමින් HNB සභාපති නිහාල් ජයවර්ධන මහතා පැවසුවේ, “රටේ ආර්ථිකය ස්ථාවරත්වය කරා අඛණ්ඩව ගමන් කරන බැවින්, 2025 පළමු කාර්තුවේදී බැංකුවේ ලබා ගත් මෙම කාර්ය සාධනය පිළිබඳව මා සතුටු වනවා. විශේෂයෙන් අසීරු කාලවලදී අපගේ ජනතාවට සහ ව්‍යාපාර සඳහා සැමවිටම ප්‍රගතියේ හවුල්කරුවෙකු ලෙස HNB මෙරට ආර්ථිකයට වැදගත් දායකත්වයක් ලබා දී තිබෙනවා. දේශීය පද්ධතිමය වශයෙන් වැදගත් බැංකුවක් (Domestic Systemically Important Bank) ලෙස, අප ශ්‍රී ලාංකිකයින්ගේ ජීවිත සහ ජීවනෝපායන් වැඩිදියුණු කිරීමට උපකාර කිරීම සඳහා කැපවී සිටිනවා.” යනුවෙනි.
බැංකුවේ ශුද්ධ ගාස්තු සහ කොමිස් ආදායම පසුගිය වසරට සාපේක්ෂව 17.0% කින් ඉහළ ගිය අතර ඉහළ ක්‍රෙඩිට් හා ඩෙබිට් කාඩ්පත් ගනුදෙනු සහ ඩිජිටල් බැංකු සේවා භාවිතය ඉහළ යාම මෙයට ප්‍රධාන වශයෙන් හේතු විය. මුදල් රහිත ආර්ථිකයක් ප්‍රවර්ධනය කිරීමේ HNB හි අඛණ්ඩ කැපවීම මෙයින් පෙන්නුම් කරයි. මීට අමතරව ශ්‍රී ලංකා රුපියල අවප්‍රමාණය වීම හේතුවෙන් අදාල කාල පරිච්ඡේදය තුළ ප්‍රධාන වශයෙන් විදේශ විනිමය ආදායමෙන් ලැබුණු අනෙකුත් ආදායම් රු. බිලියන 2.3 දක්වා ඉහළ ගියේය. 2024 වසරේ අදාල කාල පරිච්ඡේදයේදී බැංකුව රු. බිලියන 2.1 ක අලාභයක් වාර්තා කර තිබුණි.
HNB විසින් ක්‍රියාත්මක කරනු ලැබූ ශක්තිමත් අවදානම් කළමනාකරණ සැලසුම සහ නිරන්තර පසුවිපරමක් සහිත ණය අයකර ගැනීමේ ක්‍රමවේදය මගින් බැංකුවේ වත්කම් හි ගුණාත්මකභාවයේ ප්‍රාමාණික වර්ධනයක් පෙන්නුම් කර ඇත. මේ හේතුවෙන් stage 3 ණය ප්‍රමාණය ධනාත්මක වර්ධනයක් පෙන්නුම් කළ අතර මෙහි ප්‍රතිඵලයක් වශයෙන් 2024 වසරේ පළමු කාර්තුවේදී වෙන් කරන ලද රු. බිලියන 1.4 ක හානි පූර්ණ ගාස්තුවට සාපේක්ෂව බැංකුවට මේ වසරේදී වෙන් කරන ලද හානි පූර්ණ ගාස්තුවෙන් රු. මිලියන 379.7 ක් ආපසු හැරවිය හැකි විය. ඒ අනුව Net Stage 3 අනුපාතය 2024 දෙසැම්බර් මාසයේදී 1.88% සිට 2025 මාර්තු මාසයේදී 1.82% දක්වා අඩු වූ අතර stage 3 ආවරණ අනුපාතය 75.12% දක්වා වැඩි විය.
බැංකුව විසින් සේවකයින්ගේ වැටුප් නැවත සකස් කිරීම සහ කාර්ය සාධනය මත පදනම් වූ වැටුප් ක්‍රමවේදයක් හඳුන්වා දීමෙන් කාර්ය මණ්ඩල පිරිවැය ඉහළ ගිය අතර ඒ හේතුවෙන් බැංකුවේ මුළු මෙහෙයුම් වියදම් පසුගිය වසරට සාපේක්ෂව 13.5% කින් ඉහළ ගියේය.
“2025 වසරේ පළමු කාර්තුවේ ශක්තිමත් මූල්‍ය ප්‍රතිඵල මගින් දිගුකාලීන සැලසුම්, ප්‍රමුඛතාවන් සහ දිශානතිය කෙරෙහි අපගේ නොසැලෙන කැපවීම පෙන්නුම් කරනවා. ගෝලීය ආර්ථිකයේ නිරතුරුව අභියෝග තිබුණද, බැංකුවේ වත්කම්වල ගුණාත්මකභාවය, ද්‍රවශීලතාවය සහ ප්‍රමාණවත් ප්‍රාග්ධනයක් තිබීම හේතුවෙන් HNB ශක්තිමත්ව සහ ස්ථාවරව පවතිනවා. එමගින් රට පුරා සිටින විවිධ ගනුදෙනුකරුවන්ට සේවය කිරීමට සහ වත්මන් ව්‍යාපාරික පරිසරයේ අභියෝගවලට මුහුණ දීමට අපට ඉඩ සලසනවා.” යනුවෙන් HNB හි කළමනාකාර අධ්‍යක්ෂ/ප්‍රධාන විධායක නිලධාරී දමිත් පල්ලෙවත්ත මහතා පැවසීය.
