தனது பயனர்களுக்குப் பாதுகாப்பான டிஜிட்டல் சூழலை உருவாக்குவதில் கொண்டுள்ள தொடர்ச்சியான உறுதிப்பாட்டை வெளிப்படுத்தும் வகையில், 2025-ஆம் ஆண்டின் நான்காம் காலாண்டுக்கான (Q4) சமூக வழிகாட்டுதல் அமலாக்க அறிக்கையை (Community Guidelines Enforcement Report) TikTok நிறுவனம் வெளியிட்டுள்ளது. 2025 அக்டோபர் முதல் டிசம்பர் வரையிலான தரவுகளை உள்ளடக்கிய இந்த அறிக்கை, உலகளாவிய சமூகத்திற்கு ஒரு நேர்மறையான அனுபவத்தை உறுதி செய்யும் பொருட்டு, தனது சமூக வழிகாட்டுதல்களை மீறும் உள்ளடக்கங்களைக் கண்டறிந்து அகற்றுவதற்கு TikTok மேற்கொண்டுள்ள தீவிர நடவடிக்கைகள் குறித்த விபரங்களை வழங்குகிறது.
உலகளாவிய ரீதியில், இந்தக் காலாண்டில் மட்டும் TikTok மொத்தம் 17.5 கோடி (175,302,085 – சுமார் 175 மில்லியன்) வீடியோக்களை அதன் தளத்திலிருந்து நீக்கியுள்ளது, இது தளத்தில் பதிவேற்றப்பட்ட மொத்த உள்ளடக்கத்தில் சுமார் 0.5% ஆகும். இவ்வாறு நீக்கப்பட்ட வீடியோக்களில், 15,25,80,933 வீடியோக்கள் தானியங்கி கண்டறிதல் தொழில்நுட்பங்களைப் பயன்படுத்தி கண்டறியப்பட்டு அகற்றப்பட்டன, அதேவேளையில் மேலதிக ஆய்வுக்குப் பிறகு 83,60,780 வீடியோக்கள் முறையான மறுஆய்விற்குப் பிறகு மீண்டும் தளத்தில் சேர்க்கப்பட்டன. விதிமீறல்களை முன்கூட்டியே கண்டறிந்து நீக்கும் விகிதம் 99.1% ஆக இருந்ததோடு, அடையாளம் காணப்பட்ட உள்ளடக்கங்களில் 93.4% வீடியோக்கள் பதிவேற்றப்பட்ட 24 மணி நேரத்திற்குள் நீக்கப்பட்டன. TikTok தளத்தின் நம்பகத்தன்மையைப் பேணும் பொருட்டு, இந்தக் காலாண்டில் 14,77,16,518 போலி கணக்குகளும், அவற்றுடன் சேர்த்து 13 வயதிற்கும் குறைவானவர்கள் என்று சந்தேகிக்கப்பட்ட 23,875,879 கணக்குகள் பாதுகாப்பு காரணங்களுக்காக நீக்கப்பட்டுள்ளன.
இந்தக் காலாண்டில், ஒருமுறை கூடப் பார்க்கப்படுவதற்கு முன்பே நீக்கப்பட்ட வீடியோக்களின் எண்ணிக்கை குறைந்துள்ளது, இது தளத்தின் AI-அடிப்படையிலான உள்ளடக்க நெறிப்படுத்துதல் திறன்களில் ஏற்பட்டுள்ள தொடர்ச்சியான முன்னேற்றங்களைப் பிரதிபலிக்கிறது. இந்த அமைப்புகள் பழைய விதிமீறல் உள்ளடக்கங்களைக் கண்டறிந்து அகற்றுவதிலும் தற்போது அதிகத் திறன் கொண்டவையாக மாறி வருகின்றன. தேவையற்ற அல்லது புண்படுத்தும் கருத்துகளை நேரடியாக நீக்குவதற்குப் பதிலாக, அவற்றைத் தரம் குறைப்பதற்கு முன்னுரிமை அளிக்கும் புதிய அமலாக்க அணுகுமுறையினால், கருத்து நீக்கங்களின் எண்ணிக்கை கணிசமாகக் குறைந்துள்ளது. அதே வேளையில், போலி ‘லைக்குகள்’ (likes) மற்றும் பின் தொடர்பவர்களை (followers) அகற்றும் நடவடிக்கைகள் அதிகரித்துள்ளன, இது வெளிப்புற அச்சுறுத்தல்களைக் கண்டறிந்து தளத்தின் ஒருமைப்பாட்டைப் பாதுகாப்பதில் மேற்கொள்ளப்படும் தொடர்ச்சியான முயற்சிகளை உறுதிப்படுத்துகிறது.
நீக்கப்பட்ட மொத்த வீடியோக்களில் கணிசமான பகுதி—அதாவது 21.2% TikTok இன் உள்ளடக்கக் கொள்கைகளுக்கு முரணான உணர்வுப்பூர்வமான அல்லது முதிர்ந்த கருப்பொருள்களைக் கொண்டிருந்ததாக இந்த அறிக்கை குறிப்பிடுகிறது. மேலும் 9.1% வீடியோக்கள் தளத்தின் பாதுகாப்பு மற்றும் கண்ணியமான நடைமுறைத் தரங்களை மீறியுள்ளன, அதே வேளையில் 1.2% வீடியோக்கள் தனியுரிமை மற்றும் பாதுகாப்பு வழிகாட்டுதல்களை மீறியுள்ளன. கூடுதலாக, நீக்கப்பட்ட வீடியோக்களில் 1.6% தவறான தகவல்கள் எனக் கண்டறியப்பட்டுள்ளன, மேலும் 1.8% வீடியோக்கள் திருத்தப்பட்ட ஊடகங்கள் மற்றும் செயற்கை நுண்ணறிவு மூலம் உருவாக்கப்பட்ட உள்ளடக்கங்கள் என அடையாளம் காணப்பட்டுள்ளன.
TikTok நிறுவனம் தனது சமூக வழிகாட்டுதல் நடைமுறைப்படுத்தல் அறிக்கையைத் தொடர்ந்து வெளியிடுவதன் மூலம், உள்ளடக்கங்கள் மற்றும் கணக்குகள் மீது எடுக்கப்படும் நடவடிக்கைகளின் அளவு மற்றும் தன்மையைத் தெளிவுபடுத்துகிறது. இது அந்நிறுவனத்தின் முழுமையான வெளிப்படைத்தன்மையை உறுதிப்படுத்துகிறது. 2025-ஆம் ஆண்டின் நான்காம் காலாண்டு அறிக்கை குறித்த விரிவான விபரங்கள் மற்றும் TikTok இன் உள்ளடக்க வழிகாட்டுதல்கள், கருவிகள் மற்றும் கொள்கைகள் பற்றி மேலும் அறிந்து கொள்ள, ஆங்கில மொழியில் கிடைக்கும் அதன் அதிகாரப்பூர்வ ‘வெளிப்படைத்தன்மை மையத்தை’ (Transparency Centre) இணையத்தளத்தில் பார்வையிடலாம்.
