அகமதாபாத், இந்தியா மற்றும் இலங்கை, ஜூன் 26, 2026
புத்தாக்கங்களை உருவாக்கும் உலகளாவிய நிறுவனமான Zydus Lifesciences மற்றும் சன்ஷைன் ஹெல்த்கெயார் ஆகிய நிறுவனங்கள் இணைந்து, ‘Zydus Sunshine Lifesciences Pvt Ltd என்ற புதிய கூட்டு நிறுவனத்தை இன்று ஆரம்பித்துள்ளன. இலங்கையில் மருந்து உற்பத்தித் தொழிற்சாலையை அமைக்க இவர்கள் 20 மில்லியன் அமெரிக்க டொலருக்கும் (சுமார் 2 கோடி டொலர்) அதிகமாக முதலீடு செய்யவுள்ளனர். இது உள்ளூர் உற்பத்தியை அதிகரித்து, இறக்குமதிக்கான தேவையை குறைக்கும்.
ஹொரணையில் உள்ள முதலீட்டுச் சபை (BOI) வலயத்தில், சுமார் நான்கு ஏக்கர் நிலப்பரப்பில் இந்தத் தொழிற்சாலை அமையவுள்ளது. இந்தத் திட்டத்தின் உத்தியோகப்பூர்வ ஆரம்பத்தைக் குறிக்கும் வகையில், இன்று இதற்கான அடிக்கல் நாட்டப்பட்டது. இலங்கையின் சில்லறை சந்தைக்கான மருந்துப் பொருட்களை தயாரிப்பதில் இந்த தொழிற்சாலை கவனம் செலுத்தும். இது உயர்தர மருந்துகள் எளிதாகக் கிடைப்பதை உறுதி செய்வதுடன், நாட்டின் விநியோகச் சங்கிலியை வலுப்படுத்தவும் உதவும்.
இந்தக் கூட்டு முயற்சி, மருந்து தயாரிப்பில் Zydus நிறுவனத்தின் உலகளாவிய அனுபவத்தையும், சன்ஷைன் நிறுவனத்தின் உள்ளூர் விநியோக பலத்தையும் ஒன்றாக இணைக்கிறது. இந்த கூட்டாண்மை தொழில்நுட்பப் பகிர்வு, உள்ளூர் உற்பத்தித் திறன் மற்றும் வேலைவாய்ப்புகளை உருவாக்கி, இலங்கையின் சுகாதாரத் துறையின் நீண்டகால வளர்ச்சிக்கு உதவும். அத்தியாவசியத் துறைகளில் உள்நாட்டு உற்பத்திக்கு இலங்கை முன்னுரிமை அளித்து வரும் இந்தச் சூழ்நிலையில், இந்தத் திட்டம் மிக முக்கியமானது. உள்ளூர் மருந்து உற்பத்தித் திறனை வலுப்படுத்துவதன் மூலம், மருந்துகளின் தட்டுப்பாடற்ற விநியோகம் உறுதியாகும். இறக்குமதி குறையும். மேலும் மருந்துகள் மலிவான விலையிலும், எளிதாகவும் கிடைக்க வழிவகுக்கும்.
Zydus Lifesciences Ltd நிறுவனம் மருந்துகள் (formulations), மருந்து மூலப்பொருட்கள் (APIs), மருத்துவ தொழில்நுட்பம், நோயறிதல் சோதனைகள் (diagnostics), விலங்கு ஆரோக்கியம் மற்றும் நுகர்வோர் நலம் ஆகியவற்றில் பரந்த திறன்களைக் கொண்டுள்ளது. புதிய மருந்துத் தொழிற்சாலையைத் ஆரம்பித்து அதனை அடுத்த கட்டத்திற்கு கொண்டு செல்வதில், இந்த நிறுவனத்தின் உலகளாவிய சுகாதார அனுபவமும், சிறந்த உற்பத்தித் திறனும் முக்கியப் பங்கு வகிக்கும்.
Zydus Lifesciences Ltd நிறுவனத்தின் முகாமைத்துவப் பணிப்பாளர் டொக்டர் ஷர்வில் பி. பட்டேல் கூறுகையில், “வலுவான உள்ளூர் உற்பத்தித் திறன்களே நிலையான சுகாதாரத் துறைக்கு மிக முக்கியம் என்று நாங்கள் எப்போதும் நம்புகிறோம். Zydus நிறுவனத்தின் உலகளாவிய அனுபவம் மற்றும் சிறந்த உற்பத்தித் திறனை, சன்ஷைன் ஹோல்டிங்ஸ் நிறுவனத்தின் உள்ளூர் அனுபவத்துடன் இணைப்பதன் மூலம் இந்த கூட்டணி உருவாகியுள்ளது. இது இலங்கையின் சுகாதாரத் துறையை வலுப்படுத்துவதிலும், எதிர்காலத்திற்கான நிலையான மருந்து உற்பத்தித் திறனை உருவாக்குவதிலும் ஒரு முக்கிய படியாகும்.” என தெரிவித்தார்.
சன்ஷைன் ஹோல்டிங்ஸ் பி.எல்.சி. நிறுவனத்தின் குழும பிரதம நிறைவேற்று அதிகாரி ஷியாம் சதாசிவம் கூறுகையில், “இந்தக் கூட்டாண்மை, இலங்கையின் சுகாதார பாதுகாப்பு மற்றும் தொழில்முறை வளர்ச்சிக்கான ஒரு முக்கியமான முதலீடாகும். Zydus நிறுவனத்துடன் இணைந்து, உள்ளூர் மருந்து உற்பத்தியை மேம்படுத்தவும், திறமையானவர்களுக்கான வேலைவாய்ப்புகளை உருவாக்கவும், இலங்கை நுகர்வோருக்கு அத்தியாவசிய மருந்துகள் எளிதாகக் கிடைப்பதை உறுதி செய்யவும் நாங்கள் இலக்கு வைத்துள்ளோம்,” என கூறினார்.
இந்தத் திட்டம் முதலீட்டுச் சபையின் (BOI) மேற்பார்வையின் கீழ் செயல்படும். இதில் சுகாதார அமைச்சும் மற்றும் தேசிய மருந்துகள் ஒழுங்குமுறை ஆணைக்குழு (NMRA) ஆகியவை முக்கியப் பங்குதாரர்களாக இருக்கும். அனைத்து தயாரிப்புகளும் NMRA விதிகளுக்கும், நடைமுறையில் உள்ள விலை நிர்ணயக் கொள்கைகளுக்கும் உட்பட்டதாக இருக்கும்.
Zydus Lifesciences தொடர்பில்
Zydus Lifesciences நிறுவனம், மக்கள் ஆரோக்கியமாகவும் முழுமையான மனநிறைவோடும் வாழ்வதற்கான சுதந்திரத்தை வழங்குவதை நோக்கமாகக் கொண்டு செயல்படுகிறது. இது பல்வேறு வகையான மருத்துவ சிகிச்சைகளைக் கண்டறிந்து, மேம்படுத்தி, தயாரித்து சந்தைப்படுத்தும் ஒரு புத்தாக்கமான, உலகளாவிய Lifesciences நிறுவனமாகும். தரம் வாய்ந்த சுகாதாரத் தீர்வுகள் மூலம் மக்களின் வாழ்வில் மாற்றத்தை ஏற்படுத்துவதை இந்த நிறுவனம் தனது நோக்கமாகக் கொண்டுள்ளது. இதற்காக உலகம் முழுவதும் 1,500 விஞ்ஞானிகள் உட்பட மொத்தம் 30,000 பணியாளர்கள் இங்கு பணிபுரிகின்றனர். புதிய கண்டுபிடிப்புகள் மூலம் மனித வாழ்க்கையை மாற்றுவதை இந்த குழுமம் தனது லட்சியமாகக் கொண்டுள்ளது. கடந்த பத்து ஆண்டுகளில், தடுப்பூசிகள், உயிரியல் மருந்துகள் (biologicals) மற்றும் புதிய வேதிப்பொருட்கள் (New Chemical Entities) மூலம் இதுவரை தீர்க்கப்படாத மருத்துவத் தேவைகளுக்கான பல புத்தாக்கமான தயாரிப்புகளை Zydus சந்தையில் அறிமுகப்படுத்தியுள்ளது. மேலதிக விவரங்களுக்கு www.zyduslife.com என்ற இணையதளத்தைப் பார்வையிடவும்.
சன்ஷைன் ஹெல்த்கெயார் தொடர்பில்
சன்ஷைன் ஹெல்த்கெயார் லங்கா லிமிடெட் நிறுவனம், இலங்கையின் முன்னணி ஒருங்கிணைந்த சுகாதார நிறுவனங்களில் ஒன்றாகும். இது மருந்து விநியோகம், சில்லறை மருந்தகம், மருந்து தயாரிப்பு மற்றும் மருத்துவ உபகரணங்கள் போன்ற துறைகளில் செயல்பட்டு வருகிறது. சன்ஷைன் பார்மசூட்டிகல்ஸ், ஹெல்த்கார்ட் விநியோகம், ஹெல்த்கார்ட் பார்மசி, லினா மெனுஃபேக்ச்சரிங் மற்றும் சன்ஷைன் மெடிக்கல் டிவைசஸ் ஆகிய தனது முக்கிய பிரிவுகளின் மூலம், இலங்கை முழுவதும் உள்ள மக்களுக்கு உயர்தர மருந்துகளும் மருத்துவ தீர்வுகளும் எளிதாகக் கிடைப்பதில் இந்த நிறுவனம் முக்கிய பங்கு வகிக்கிறது.
