ශ්‍රී ලංකාවේ ග්‍රාමීය ක්ෂුද්‍ර මූල්‍ය ක්ෂේත්‍රයේ උන්නතිය වෙනුවෙන් නිරන්තරයෙන් අතහිත දෙන මෙරට ප්‍රමුඛතම පෞද්ගලික අංශයේ බැංකුවක් වන හැටන් නැෂනල් බැංකුව විසින් 6 වන වටරත් පවත්වනු ලබන HNB ගැමි පුබුදුව අවුරුදු පොළ 2025 මෙවරත් අප්‍රේල් මස 5 සහ 6 යන දෙදින තුළ කොළඹ බණ්ඩාරනායක සම්මන්ත්‍රණ ශාලා පරිශ්‍රයේදී පැවැත්වීමට නියමිතය.
දිවයින පුරා විසිරී සිටින ක්ෂුද්‍ර මූල්‍ය ව්‍යවසායකයින් 150 දෙනෙක් තම නිෂ්පාදන ගැමි පුබුදුව අවුරුදු පොළේදී ප්‍රදර්ශනය කිරීමට නියමිත අතර ඔවුන්ට තම නිෂ්පාදන අලෙවියට අමතරව නව වෙළඳපොල අවස්ථාවන් හිමි කරගැනීමට ද මෙය කදිම අවස්ථාවක් ලෙස පෙන්වා දිය හැකිය.
HNB හි ප්‍රමුඛතම ක්ෂුද්‍ර මූල්‍ය වැඩසටහන වන ගැමි පුබුදුව යටතේ සංවිධානය කරන ලද මෙහි අරමුණ වන්නේ ග්‍රාමීය ක්ෂුද්‍ර මූල්‍ය ව්‍යවසායකයින් නාගරික වෙළඳපොළවල් සමඟ සම්බන්ධ කිරීමයි. ග්‍රාමීය ක්ෂුද්‍ර මූල්‍ය ව්‍යවසායකයින් උදෙසා බැංකුව විසින් වාර්ෂිකව සංවිධානය කරනු ලබන මෙම අවුරුදු පොළ, ශ්‍රී ලංකාවේ ක්ෂුද්‍ර, කුඩා හා මධ්‍ය පරිමාණ ව්‍යවසායන් (MSMEs) සඳහා සහාය වීමේ සඳහා HNB හි කැපවීම මැනවින් පෙන්නුම් කරයි.
මේ පිළිබඳව අදහස් දක්වමින් HNB ක්ෂුද්‍ර මූල්‍ය අංශයේ උප සභාපති මහින්ද සෙනෙවිරත්න මහතා පැවසුවේ “ගැමි පුබුදුව අවුරුදු පොළ ග්‍රාමීය ව්‍යවසායකයින්ට නව වෙළඳපොළවල් වෙත ප්‍රවේශ වීමට, නව ව්‍යාපාර හා වෙළෙඳ සම්බන්ධතා ගොඩනඟා ගැනීමට සහ ඔවුන්ගේ ව්‍යාපාර පුළුල් කිරීමට උපකාරී වන කදිම අවස්ථාවක් ලෙස පෙන්වා දිය හැකියි. ආර්ථිකමය වශයෙන් වැදගත් කොළඹ වැනි නගරයකට ඔවුන් රැගෙන විත් මෙම අවස්ථාව ලබා දීමෙන් අපගේ ක්ෂුද්‍ර මූල්‍ය ගනුදෙනුකාරභවතුන්ට කුඩා දේශීය ව්‍යාපාරවල සිට තිරසාර, පුළුල් ව්‍යවසායන් දක්වා වර්ධනය වීමට අප උපකාර කරනවා.” යනුවෙනි.
මෙම අවුරුදු පොළ නැරඹීම සඳහා පැමිණෙන ජනතාවට HNB හි ක්ෂුද්‍ර මූල්‍ය සේවාවල සහාය ලබන ව්‍යවසායකයින් විසින් නිර්මාණය කරන ලද සාම්ප්‍රදායික ආහාර, අත්කම් නිර්මාණ, කුළුබඩු, රෙදිපිළි සහ පැළ වර්ග ඇතුළු දේශීයව සාදන ලද විවිධ නිෂ්පාදන දැකබලා ගැනීමට අවස්ථාව ඇත. තවද මෙම ක්ෂුද්‍ර මූල්‍ය ව්‍යවසායකයින්ට ඔවුන්ගේ නිෂ්පාදන අලෙවි කිරීමට අමතරව ඔවුන්ගේ වර්ධනයට සහාය විය හැකි විශේෂ ගැනුම්කරුවන්, ආයතනික පාර්ශවකරුවන් සහ ව්‍යාපාරික හවුල්කරුවන් සමඟ සම්බන්ධ වීමට ද මෙහිදී අවස්ථාව ලබා දෙයි.
සෑම වසරකම, HNB අවුරුදු පොළ ග්‍රාමීය ව්‍යවසායකයින්ගේ කුසලතා ප්‍රදර්ශනය කරන අතර, ඔවුන්ට වටිනා පිළිගැනීමක් සහ ආදායම් අවස්ථා ලබා දෙයි. ගැමි පුබුදුව හරහා HNB, ව්‍යවසායකයින්ට මූල්‍යමය සහාය, ව්‍යාපාර උපදෙස්, වෙළඳපල සංවර්ධන අවස්ථා සහ කුසලතා වර්ධනය සඳහා අඛණඩව සහයෝගය දක්වයි.
HNB අවුරුදු පොළ මහජනතාවට විවෘත අතර ඇතුළුවීම නොමිලේ.
දිවයින පුරා පාරිභෝගික ඒකක 254ක් සහ Self Service යන්ත්‍ර (SSM) 800කට අධික සංඛ්‍යාවකින් සමන්විත HNB යනු ශ්‍රී ලංකාවේ විශාලතම, තාක්ෂණික වශයෙන් නව්‍යකරණය වූ පුද්ගලික බැංකුවකි. පසුගියදා පැවතිි ‘’TAB Global Excellence in Retail Financial Services Awards 2025’’ සම්මාන උළෙලේදී නව්‍යකරණ සේවාවන්, මූල්‍ය අන්තර්ගතභාවය හා පාරිභෝගික කේන්ද්‍රීය බැංකුකරණය වෙනුවෙන් මෙරට විශිෂ්ටතම පාරිභෝගික බැංකුව ලෙස 15 වැනි වරටත් බැංකුව සම්මානයට පාත්‍ර විය. මීට අමතරව HNB තිරසාරභාවය සහ සමාජ වගකීම කෙරෙහි දැඩි අවධානයක් යොමු කරමින් විශිෂ්ට පාරිභෝගික සේවාව, මෙහෙයුම් කාර්යක්ෂමතාව සහ නව්‍ය විසඳුම්වල විශිෂ්ටත්වය සඳහා බැංකුව කැපවී සිටී. මූල්‍ය ක්ෂේත්‍රයට බැංකුව ලබා දෙන කැපී පෙනෙන දායකත්වය වෙනුවෙන් HNB නිරන්තරයෙන් පිළිගැනීමට ලක්ව ඇති අතර එහි නායකත්වය සහ කාර්යසාධනය වෙනුවෙන් සම්මාන රැසක් හිමි කරගෙන ඇත.
