දිනපතා විවිධ පීඩනයන්ට ලක්වන අහිංසක සතුන් මරණයෙන් ගලවා ගනිමින් ඔවුන්ට වඩා හොඳ හෙට දවසක් උදා කරදීම වෙනුවෙන් කැපවුණු ස්වේච්ඡා වැඩසටහනක් වන Animal SOS Sri Lanka යනු ශ්‍රී ලංකාවේ දකුණු වෙරළ තීරයේ පිහිටුවා ඇති එක්සත් රාජධානියේ ලියාපදිංචි සමාජ සේවා ආයතනයකි. Kim Cooling මහත්මිය විසින් ආරම්භ කර ඇති මෙම ආයතනය තුළින් අයාලේ යන සතුන්ට සැබෑ ජීවිතයක් උරුම කර දීමට කටයුතු කරයි. ශ්‍රී ලංකාව තුළද අයාලේ යන සතුන් පිළිබඳව සියැසින් දුටු Cooling මහත්මිය මෙම ආයතනය ශ්‍රී ලංකාවේදී පිහිටුවීමට කටයුතු කළාය.
සත්ව සුබසාධනය සඳහා සුවිශේෂී ප්‍රවේශයක්
තුවාල ලැබූ, අතහැර දැමූ හා විවිධ අනතුරුවලට මුහුණ දුන් සතුන් බේරා ගනිමින් පුනරුත්ථාපනය කිරීම ප්‍රධාන කාර්යය කොටගත් Animal SOS Sri Lanka විසින් මේ වන විට විශේෂිත සතුන් 500කට අධික ප්‍රමාණයක් ඇතුලුව බළලුන් හා බල්ලන් 2600කට අධික සංඛ්‍යාවක් වෙත සහනයක් ලබා දීමට කටයුතු කර ඇත.
සතුන්ට නවාතැන් දීමට වඩා ඔවුන්ගේ තුවාල හෝ ලෙඩ රෝග සුව කිරීම සඳහා වන ආරක්ෂිත අවකාශයක් සලසා දෙන Animal SOS Sri Lanka අයාලේ යන සත්ව ගහණය පාලනය කිරීමට හා ජලභීතිකා වැනි රෝග තත්වයන් අවම කිරීම සඳහා වන්ද්‍යාකරණ වැඩසටහන් ද ක්‍රියාත්මක කරනු ලබයි. ඊට අමතරව සතුන්ට ආදරය හා කරුණාව වැනි අධ්‍යාපනික වැඩසටහන් පවත්වනු ලබන එම සංවිධානය අනුකම්පාව හා වගකිවයුතු සුරතල් සතුන් රැකබලාගැනීම පිළිබඳ දැනුම බෙදා හැරීම වෙනුවෙන් පාසල් හා විවිධ ප්‍රජාවන් සමඟද කටයුතු කරනු ලබයි.
යහපත වෙනුවෙන් TikTok හි හැකියාව යොදා ගැනීම
TikTok සතු හැකියාව හා නිර්මාණශීලීත්වය තුළින් විවිධ ආයතනවලට තමන්ගේ නිෂ්පාදන හා සේවාවන් ජනතාව අතරට ගෙන යාමේ කදිම මඟක් බවට පත්ව ඇත. ආකර්ෂණීය වීඩියෝ හා ඡායාරූප ඉදිරිපත් කිරීම තුළින් ප්‍රේක්ෂකයින් වෙත ඉක්මණින් හා සරලව පණිවිඩ ගෙන යාමට කටයුතු කරන TikTok මෙම Animal SOS Sri Lanka වෙතද එම අවස්ථාව උදා කර දී ඇත්තේ සතුන්ගේ සුබ සාධනය වෙනුවෙන් ඔවුන් ඉටු කරන කාර්යභාරය පිළිබඳව ජනතාව දැනුවත් කිරීම වෙනුවෙනි.
මේ සම්බන්ධයෙන් අදහස් දක්වමින් Cooling මහත්මිය සඳහන් කර සිටියේ “අපි ගලවාගත් සතුන්ගේ වත්මන් වෙනස්වීම පිළිබඳ ප්‍රදර්ශනය කිරීමට, ඔවුන්ගේ ඔරොත්තු දීමේ හැකියාව පෙන්වා දීමට හා හදිසි පරිත්‍යාග හෝ වෛද්‍ය සැපයුම් සඳහා ආධාර ලබා ගැනීමට අපි TikTok භාවිත කරනවා” යනුවෙනි.
මෙම වේදකාව භාවිතය තුළින් මේ වන විට පුලුල් ප්‍රේක්ෂක පිරිසක් වෙත සමීප වීමට Animal SOS Sri Lanka හට හැකි වී ඇත.
ලකීගේ කතාව
Animal SOS Sri Lanka හි පිළිසරණ ලැබූ සුවහසක් සතුන් අතරින් ලකී නම් බල්ලාගේ කතාව ඉතා විශේෂය. ලකී මෙම ස්ථානයට ගෙන ආවේ වාහනයක ගැටීමෙන් ඇවිදීමට පවා නොහැකි තත්වයක් තුළය. ලකීගේ ජීවිතයට පවා තර්ජනයක් පැවති තත්වයක් තුළ Animal SOS Sri Lanka ඔහුට පිහිට වීමට කටයුතු කළේ ජීවිතයේ දෙවැනි අවස්ථාවක් උදාකර දෙමිනි. කාලයක් යන විට සියලු තුවාල සුවපත් වෙමින් නිරෝගී බල්ලකු බවට පත් වූ ලකී අද වන විට බොහෝ දෙනා අතර ජනප්‍රිය සාධකයක් බවට පත්ව ඇත්තේ සංවිධානයේ තානාපතිවරයකු බවට පත් වෙමිනි.
මේ ආකාරයේ සතුන් සුවපත් කිරීමට අමතරව වඳ සැත්කම් සිදු කිරීම හා ජල භීතිකා එන්නත් ලබා දීම තුළින් අයාලේ යන සත්ව ගහණය අඩු කිරීමටද මහජන සෞඛ්‍යය ඉහළ නැංවීමටද උපකාර කරන Animal SOS Sri Lanka ඒ සියලු දේ සඳහා ප්‍රජා සහයෝගය ලබා ගැනීමටද කටයුතු කරනු ලබයි.
හදිසි උපකාරයන්හි අවශ්‍යතාව
විශේෂයෙන් මෙම සංවිධානය අරමුදල් සපයා ගැනීමේදී පරිත්‍යාග පිළිබඳව වැඩි අවධානයක් යොමු කරනු ලබයි. TikTok වේදිකාව තුළින් ඊට අවශ්‍ය සහයෝගය ප්‍රජාවගෙන් ඉල්ලා සිටින Animal SOS Sri Lanka මේ වන විට අරමුදල් සපයා ගැනීම පිළිබඳව දැඩි අර්බුදකාරී තත්වයකට පත්ව ඇති බව ක්‍දදකසබට මහත්මිය පවසයි.
මෙහිදී ඔවුන් ප්‍රජාවගෙන් බලාපොරොත්තු වන්නේ අරමුදල් සපයාදීම පමණක්ම නොවේ. තමන් යටතේ සිටින එක් සතෙකුට අනුග්‍රහය දැක්වීම, ඔවුන් සමඟ ගත කිරීමට කාලයක් වැය කිරීම, උපන්දින හෝ වෙනත් සැමරුම් සිදු කිරීමේදී ආයතනය සමඟ සම්බන්ධ වීම වැනි බොහෝ දේ සඳහා සංවිධානය ප්‍රේක්ෂකයන් වෙත ආරාධනා කර සිටියි. එසේම තම සංවිධානය හා එහි කාර්යභාරය පිළිබඳව ජනතාව දැනුවත් කිරීම හා ඒ පිළිබඳව අනෙකුත් පුද්ගලයින් උනන්දු කරවීම තුළින් මීට තවදුරටත් දායක වීමට ඔබට හැකියාව ඇත.
සෑම සතෙකුම ජීවත් වීමට කැමතිය. සතුටින් සිටීමට කැමතිය. ඒ සෑම සතෙකුටම යම් කතාවක් ඇති අතර ඒ සෑම කතාවකටම වඩා හොඳ අවසානයක් තිබිය යුතු බව Animal SOS Sri Lanka හි පිළිගැනීමයි. ඒ වෙනුවෙන් සතුන්ට ආදරය හා කරුණාව දක්වන ශ්‍රී ලාංකිකයින් සමඟ එක් වෙමින් සුවිසල් කාර්යභාරයක් ඉටු කරන ඔවුන් සිය ප්‍රචාරණ වැඩසටහන් සඳහා TikTok වැනි සමාජ මාධ්‍ය භාවිත කරමින් තවදුරටත් අහිංසක සතුන්ගේ හෙට දවස වෙනුවෙන් තමන් සමඟ එක්වන ලෙස සුවහසක් ශ්‍රී ලාංකිකයින්ට ඇරයුම් කර සිටියි.
