ශ්‍රී ලංකාවේ ප්‍රමුඛතම පුද්ගලික අංශයේ බැංකුවක් වන හැටන් නැෂනල් බැංකුව මෙරට කිරි නිෂ්පාදන කර්මාන්තයේ දියුණුව වෙනුවෙන් තවත් සුවිසල් ඉදිරි පියවරක් තබමින් සිය වටිනාකම් මූල්‍යකරණ වැඩසටහන යටතේ Wonrich Dairy පුද්. සමාගම සමඟ උපාය මාර්ගික හවුල්කාරීත්වයකට එළැඹුණේය.
ශ්‍රී ලංකාවේ කිරි ගොවීන් සවිබල ගැන්වීම අරමුණු කරගත් මෙම හවුල්කාරීත්වය තුළින් කිරි ගොවීන්ට සරිලන මූල්‍ය විසඳුම් හා සහාය ලබා දෙමින් ඒ ඒ ගොවීන්ට සරිලන ආකාරයේ මූල්‍ය සේවා, තාක්ෂණික සහාය සහ අත්‍යාවශ්‍ය සම්පත් පහසුවෙන් සපුරා ගැනීමේ හැකියාවද සලසා දීමට නියමිතය.
මෙම සහයෝගීතාව සම්බන්ධයෙන් අදහස් දැක්වූ HNB නියෝජ්‍ය සාමාන්‍යාධිකාරී කුඩා හා මධ්‍ය පරිමාණ ව්‍යවසාය සහ ක්ෂුද්‍ර මූල්‍ය රජීව් දිසානායක මහතා සඳහන් කර සිටියේ “Wonrich Dairy පුද්. සමාගම සමඟ ඇති කරගනු ලැබූ මෙම හවුල්කාරීත්වය ශ්‍රී ලංකාවේ කිරි ගොවි ප්‍රජාව නඟා සිටුවීම වෙනුවෙන් වන අපගේ කැපවීමේ වැදගත් සන්ධිස්ථානයක් ලෙස සඳහන් කළ හැකියි. කෘෂිකාර්මික හා සත්ව පාලන ක්ෂේත්‍රයේ දියුණුවට හා සංවර්ධනයට හේතු වන මූල්‍ය විසඳුම් ලබා දීම සඳහා අප කටයුතු කරන ආකාරය පිළිබඳව මේ තුළින් මනාව පිළිබිඹු වනවා. මෙම කර්මාන්තය තුළ අර්ථවත් පරිවර්තනයක් ඇති කිරීම වෙනුවෙන් අපි නිරන්තරයෙන් දේශීය ගොවි ප්‍රජාව සවිබල ගැන්වීම සහ තිරසාර ගොවිතැන් ක්‍රම ප්‍රවර්ධනය කිරීමට අවධානය යොමු කොට තිබෙන අතර මෙම සබඳතාව ඊට කදිම සාක්ෂියක්.” යනුවෙනි.
මෙම හවුල්කාරීත්වය තුළින් ගොවි ජනතාව වෙත ප්‍රධාන වශයෙන් නවීන කෘෂි කාර්මික ශිල්ප ක්‍රම සහ උපකරණ සඳහා ආයෝජනය කිරීමට හැකි ලෙස සැකසූ මූල්‍ය පහසුකම්, විස්තීරණ පුහුණු වැඩසටහන් සහ මනා කෘෂිකාර්මික භාවිතයන් වෙනුවෙන් උපකාර කිරීමට අවශ්‍ය තාක්ෂණික සහාය, ආහාර, පශු වෛද්‍ය සේවා, අභිජනනය වැනි උසස් තත්වයේ පහසුකම් ලබා ගැනීමේ හැකියාව ලබා දෙනු ඇත. එසේම නිෂ්පාදනයේ සිට වෙළෙඳපොල දක්වා ගොවීන්ට උපකාරී වන හා ඔවුන්ගේ ආදායම ඉහළ නංවන ශක්තිමත් වටිනාකම් දාමයක් නිර්මාණය කිරීමටද මේ තුළින් බලාපොරොත්තු වේ.
මෙහිදී අදහස් දැක්වූ Wonrich Dairy කළමනාකාර අධ්‍යක්ෂ/ප්‍රධාන විධායක නිලධාරී ආර්.එම්. රත්නායක මහතා පැවසුවේ “ශ්‍රී ලංකාවේ කිරි ගොවි ප්‍රජාව වෙත සෞභාග්‍යමත් අනාගතයක් උදා කර දීමේ අපගේ අරමුණු සමඟ මනාව ගැලපෙන මෙම හවුල්කාරීත්වය මෙරට කිරි කර්මාන්තයේ ධනාත්මක පරිවර්තනයකට හේතු වනු ඇතැයි අපි විශ්වාස කරනවා. කර්මාන්තය නඟා සිටුවීම, රටේ ආර්ථික සංවර්ධනය හා ආහාර සුරක්ෂිතතාව ඉහළ නැංවීම සඳහා සැලකිය යුතු දායකත්වයක් ලබා දෙන දියුණු කිරි නිෂ්පාදන අංශයන් බිහි කිරීමට අපි කටයුතු කරනවා” යනුවෙනි.
මෙම වැඩසටහන තුළින් ශ්‍රී ලංකාවේ විවිධ ප්‍රදේශවල කිරි ගොවීන් 12,500කට අධික සංඛ්‍යාවක් වෙත සේවය සලසනු ඇති අතර නවීන කිරි ගොවිතැන් ක්‍රම හා ව්‍යාපාර කළමනාකරණය කෙරෙහි අවධානය යොමු කරමින් කෘෂිකාර්මික විශේෂඥයින් සහ කර්මාන්ත වෘත්තිකයින් විසින් පවත්වනු ලබන වැඩමුළු හා පුහුණු වැඩසටහන්ද ඊට ඇතුළත් වේ.
ඡායාරූපය:
HNB වැඩබලන ප්‍රධාන විධායක නිලධාරී දමිත් පල්ලෙවත්ත මහතා (වමේ සිට පස් වැන්නා) සහ Wonrich පුද්. සමාගමේ කළමනාකාර අධ්‍යක්ෂ/ප්‍රධාන විධායක නිලධාරී ආර්.එම්.සී.පී. රත්නායක මහතා (වමේ සිට 6 වැන්නා) විසින් අවබෝධතා ගිවිසුම් හුවමාරු කරගනිමින්. මෙම අවස්ථාව සඳහා (වමේ සිට) HNB කළමනාකරු (නිකවැරටිය ශාඛාව) අකීල් අහමඩ්, HNB කලාපීය ව්‍යාපාර ප්‍රධානී නිරෝෂ් එදිරිසිංහ, HNB ක්ෂුද්‍ර මූල්‍ය ප්‍රධානී මහින්ද සෙනෙවිරත්න, HNB නියෝජ්‍ය සමානා්‍යාධිකාරී කුඩා හා මධ්‍ය පරිමාණ ව්‍යවසාය සහ ක්ෂුද්‍ර මූල්‍ය රජිව් දිසානායක, Wonrich මානව සම්පත් කළමනාකාර ඊ.එම්. ධර්මසිරි ඒකනායක, සහකාර කළමනාකාර ඩී. එම්.සී.බී. දිසානායක, HNB ක්ෂුද්‍ර මූල්‍ය සබඳතා හා ප්‍රාදේශීය ව්‍යාපාර කළමනාකාර හිරාන් කරුණාරත්න සහ ක්ෂුද්‍ර මූල්‍ය කළමනාකාර අමිල ජයසේකර යන මහත්වරුන්ද ඡායාරූපයේ වෙයි.
