2025 අගෝස්තු 25 වන දින සිට ක්‍රියාත්මක වන පරිදි TVS Motor හි සභාපති හා කළමනාකාර අධ්‍යක්ෂවරයා ලෙස සුදර්ශන් වෙනු මහතා නම් කිරීමට එහි අධ්‍යක්ෂ මණ්ඩලය පසුගියදා ඒකමතිකව තීරණය කළේය. ඒ අනුව අගෝස්තු 25 වන දින සිට ඒ මහතා TVS Motor හි අදාළ තනතුරුවල රාජකාරී අරඹනු ඇත.
වර්තමානයේ එහි සභාපතිවරයා ලෙස කටයුතු කරන ශ්‍රීමත් රැල්ෆ් ස්පෙත් මහතා අධ්‍යක්ෂ මණ්ඩලය වෙත දැනුම් දී ඇත්තේ මීළඟ වාර්ෂික මහා සභා රැස්වීමෙන් පසු නැවත සභාපතිවරයා ලෙස පත්වීමට අපේක්ෂා නොකරන බවයි. ඒ අනුව 2025 අගෝස්තු 22 වන පැවැත්වීමට නියමිත වාර්ෂික මහා සභා රැස්වීමෙන් පසුව ඒ මහතා සභාපති ධූරයෙන් ඉවත් වනු ඇත.
එහෙත් 2025 අගෝස්තු 23 වන දින සිට බලපැවැත්වෙන පරිදි වසර 3ක කාලක් සඳහා ශ්‍රීමත් රැල්ෆ් ස්පෙත් මහතා සමාගමේ ප්‍රධාන උපදේශකයෙකු ලෙස පත් කිරීමට නියමිත අතර ඔහු සතු දැනුම, අත්දැකීම් හා විශේෂඥතාව තුළින් අඛණ්ඩ ප්‍රතිලාභ ලබා ගැනීමට ඒ තුලින් අපේක්ෂා කරනු ලබයි.
මේ සම්බන්ධයෙන් අදහස් දැක්වූ TVS Motor හි විශ්‍රාමික සභාපති වෙනු ශ්‍රීනිවාසන් මහතා සඳහන් කර සිටියේ “පසුගිය වසර 3ක කාලය පුරා TVS Motor හි සභාපතිවරයා ලෙස රැල්ෆ් ස්පෙත් මහතා විසින් ලබා දුන් නායකත්වය පිළිබඳව මගේ ස්තුතිය පුද කර සිටිනවා. ඔහු ගෝලීය වෙළෙඳපොල වෙත අපගේ උපාය මාර්ගිය ව්‍යාප්තිය සඳහා මඟ පෙන්වීමට මෙන්ම කර්මාන්තයේ දියුණුව වෙනුවෙන් වන නවෝත්පාදනයන් දිරිමත් කිරීමට සුවිසල් දායකත්වයක් ලබා දුන්නා. ඒ වගේම TVS Motor හි ප්‍රධාන උපදේශකවරයා ලෙස අඛණ්ඩව සහයෝගය ලබා දීමට කටයුතු කිරීම පිළිබඳව අපගේ ස්තුතිය පුද කර සිටින අතර නව කළමනාකාර අධ්‍යක්ෂවරයා ලෙස වැඩ භාරගන්නා සුදර්ශන් වෙනු මහතා සාදරයෙන් පිළිගනු ලබනවා. ඔහු නව කළමනාකාර අධ්‍යක්ෂවරයා ලෙස සමාගමේ සාර්ථකත්වය වෙනුවෙන් කැපවී කටයුතු කරනු ඇතැයි අපි බලාපොරොත්තු වනවා.”යනුවෙනි.
ශ්‍රීමත් රැල්ෆ් ස්පෙත් මහතා මෙහිදී අදහස් දක්වමින් “ගෙවුණු වසර 3ක කාලය තුළ TVS Motor හි සභාපතිවරයා ලෙස කටයුතු කිරීමට ලැබීම පිළිබඳව ඉතාම සතුටුයි. මගෙන් පසුව එම ධූරයෙහි වගකීම භාරගන්නා සුදර්ශන් වෙනු මහතා TVS Motor හි වටිනාකම් ආරක්ෂා කරමින් එහි වර්ධනීය ගමන අඛණ්ඩව ඉදිරියට ගෙන යනු ඇතැයි මා සිතනවා. සුදර්ශන් සතු හැකියාව, දැනුම හා අත්දැකීම් තුළින් ආයතනය සාර්ථකත්වය වෙත කැඳවාගෙන යාමට හැකියි. සුදර්ශන් සහ TVS Motor ආයතනයට මාගේ සුබ පැතුම් එක් කිරීමට මෙය අවස්ථාවක් කර ගන්නවා.” යනුවෙන් පැවසීය.
සුදර්ශන් වෙනු මහතා අදහස් දක්වමින් පවසා සිටියේ “TVS Motor හි සභාපති හා කළමනාකාර අධ්‍යක්ෂකවරයා ලෙස මා පත් කිරීම පිළිබඳව ඉතාමත් සතුටට පත් වන අතර ඒ වෙනුවෙන් මාගේ ස්තුතිය පුද කර සිටිනවා. සභාපතිවරයා ලෙස මෙහි සාර්ථකත්වය වෙනුවෙන් ඉදිරි වැඩකටයුතු සිදු කිරීමේදී සියලු දෙනාගේ සහයෝගය හිමි වනු ඇතැයි මම අපේක්ෂා කරනවා. සමුගන්නා සභාපතිවරයා ආයතනයේ අභිවෘද්ධිය වෙනුවෙන් සුවිසල් කාර්යභාරයක් ඉටු කර ඇති අතර නව අවස්ථාවන් උපයෝගී කර ගනිමින් එය තවදුරටත් ඉදිරියට ගෙන යාමට මම බලාපොරොත්තු වනවා.” යනුවෙනි.
