ගෝලීය ඇඟලුම් සහ රෙදිපිළි නිෂ්පාදන තාක්ෂණයේ ප්රමුඛයා වන MAS Holdings පසුගියදා පැවති 2025 ජාතික පිවිතුරු නිෂ්පාදන සම්මාන උළෙලේදී තිරසාර හා සදාචාරාත්මක නිෂ්පාදනය උදෙසා කරන ලද සුවිශේෂී කාර්යභාරය වෙනුවෙන් සම්මාන රැසක් දිනා ගැනීමට සමත් විය.
මෙම සම්මාන උළෙල කර්මාන්ත හා ව්යවසායකත්ව සංවර්ධන අමාත්ය සුනිල් හඳුන්නෙත්ති මහතාගේ ප්රධානත්වයෙන් කොළඹදී පැවැත්විණි.
මෙහිදී MAS විසින් මහා පරිමාණ නිෂ්පාදන සමාගම් කාණ්ඩය යටතේ එහි නිෂ්පාදන සහ රෙදිපිළි අංශය වෙනුවෙන් රන්, රිදී, ලෝකඩ සහ කුසලතා සම්මාන දිනා ගන්නා ලදී. මෙම සම්මාන මගින් MAS කණ්ඩායම් ඔවුන්ගේ ව්යාපාරික මෙහෙයුම් කාර්යක්ෂමතාව වැඩිදියුණු කිරීම, පාරිසරික බලපෑම අවම කිරීම සහ සමාගමේ සමස්ත නිෂ්පාදන ක්රියාවලිය පුරාම ද්රව්ය නැවත භාවිතා කිරීම සහ ප්රතිචක්රීයකරණය කිරීම වැනි පිළිවෙත් ඇතුළත් කිරීම සඳහා MAS දරන අඛණ්ඩ කැපවීම පෙන්නුම් කරයි.
මෙහිදී මහා පරිමාණ නිෂ්පාදන කාණ්ඩයේ – ඇඟලුම් අංශය සඳහා බියගම Silueta රන් සම්මානයක් දිනා ගත් අතර කුලියාපිටියේ MAS Intimates Slimtex සහ හොරණ Bodyline රිදී සම්මාන දිනා ගත්තේය. මීට අමරතව මහියංගනය MAS Active Kreeda Shadeline ලෝකඩ සම්මානයක් සහ පල්ලෙකැලේ Contourline කුසලතා සම්මානයක් දිනා ගත්තේය.
මහා පරිමාණ නිෂ්පාදන කාණ්ඩය – රෙදිපිළි අංශය සඳහා බියගම MAS Active Linea Intimo රන් සම්මානයක් දිනා ගත් අතර තුල්හිරිය MAS Fabrics Intimo රිදී සම්මානයක් හිමි විය. තවද බියගම Noyon Lanka මෙම අංශයෙන් කුසලතා සම්මානයක් දිනා ගත්තේය.
ශ්රී ලංකාවේ ජාතික පිවිතුරු නිෂ්පාදන මධ්යස්ථානය (NCPC) කර්මාන්ත හා ව්යවසායකත්ව සංවර්ධන අමාත්යාංශය සමඟ එක්ව මෙම සම්මාන උළෙල සංවිධානය කළේය. ජාතික පිවිතුරු නිෂ්පාදන සම්මාන උළෙලේදී පිවිතුරු නිෂ්පාදන සහ තිරසාර භාවිතයන් සඳහා කැපී පෙනෙන කැපකිරීමක් සිදුකළ සමාගම් ඇගයීමට ලක්කරනු ලබයි. 2007 වසරේ දී මෙම සම්මාන උළෙල ආරම්භ කළ දා සිට මෙහි අරමුණ වූයේ නිෂ්පාදන, සේවා සහ රාජ්ය ආයතනවල තිරසාර භාවිතය සහ නිෂ්පාදනය ශක්තිමත් කිරීම සඳහා ශ්රී ලාංකික ව්යාපාර දිරිමත් කිරීමයි.
මෙම සම්මාන මගින් ශ්රී ලංකාව තුළ වඩාත් වගකිවයුතු නිෂ්පාදන පරිසරයක් නිර්මාණය කිරීම සඳහා MAS හි අඛණ්ඩ කැපවීම පෙන්නුම් කරයි. මෑතකදී 2030 වසර සඳහා එහි ඉලක්ක ප්රකාශයට පත් කළ සමාගමේ පුළුල් Plan for Change සැලැස්ම ඊට කදිම සාක්ෂියකි. MAS Holdings හි තිරසාර ගමනේ සුවිශේෂී සන්ධිස්ථානයක් සනිටුහන් කරනු ලබන Plan for Change 2030 යනු නිෂ්පාදනය, ජීවිත හා පරිසරය කෙරෙහි එහි බලපෑම වැඩිදියුණු කිරීම සඳහා නිර්මාණය කර ඇති MAS හි දිගුකාලීන තිරසාර උපායමාර්ගයයි.
පිවිතුරු නිෂ්පාදනය වැඩිදියුණු කිරීම, පාරිසරික වගකීම ශක්තිමත් කිරීම සහ සම්පත් කාර්යක්ෂමතාව සහ ද්රව්ය නැවත භාවිතා කිරීම සහ ප්රතිචක්රීයකරණය කිරීම වැනි පිළිවෙත් කරා ශ්රී ලංකාව රැගෙන යන ගමනට සහාය වීම සඳහා MAS කැපවී සිටී.
